بمناسبة الذكرى الرابعة لأول لقاء معك ... سألوني عليك ... و هكا أنا حكيت ...

هيّ ... لّـى حبّيتـها آنــا .. هيّ إلّى نغير عليها حتّـى من حروفى.. هيّ .. تصويرة قعدت كيما هيّ .. مهما الوقت بدّل فينـا ..هيّ .. إلّى نحـب نتفكّرها كان بالباهـى .. ونزلعها سعات كى نحـس غصّـة و نحكى مالمخبّـى .. أما تبقى هيّ ، روحـي و عشرت السّكات .. طرف منّـي .. بلّى نبدّل وجهـى .. يقعد الدّخلاني مخبية فيه إنتـي ...

ديما على بالي .. يخطرلي نطلبك .. نحكيو كينّو شيئ ما صار .. لا تسئلنى على أحوالي بعيد عليك ... لا نسئلك على أحوالك بعدى .. يخطرلي نكلمك .. نشوفك و نحكيو .. نحكيو أي حاجة تافهة .. نتفرج فيك تحكى نسمعك و نعبّى عنيّا منّك ... قدّاش حنّيت لوقت نعدّيه معاك .. لا تسئلنى قدّاش عرفت بعدك لا نسئل شكون معاك .. نطفّيو الضوء و ننساو رواحنا نهار شماته فى رواحنا .. شماته فى المكتوب ..تــي ... على شكون نكذبو ؟ و هيّ الغيرة باش تخلّينا نسكتو؟ .. التنسنيس أكيد باش يخلّينا ننطقو .. نتكلمو من جنابنا .. و حتّى بالسكات .. عارف إلّى عنيّا باش تاكلك كيما عينيك راتنى فى إخّر مرّة تلاقينا .. تلاحض و توزن و تشوف إذا أحوالى بلا بيك كيما كانت..

نحب نشوفك ... نحب نشوفك في كل بلاصه كنا نقعدو فيها ... كالشباك المحنون متع المكتبة ... في الساحه الحمراء ...
الشباك متع المكتبة و الا الساحه الحمراء ... نساونا كيما نسيناهم زعما ؟ .. لحقيقة بعدك مازتش مشيت و بقيت غادي .. لا نجمت نعوضك لا بصاحبة لا كتاب لا موزيكة .. وإذا سئلنى واحد وإلّا وحدة عليك .. أكيد العشويّة موش باش توفى على خير ..
تخيّل نمشيو شماته ؟ .. وإذا سئلوا نقولولهم كنّا مسافرين .. كيما ديما حلمنا .. وهنا اليوم رجعنا .. رجعنا لبلادنا .. و عقلنـا...

على بالى .. و يخطرلى .. هكّة .. نعرضك بصّدفة ،إلّى هيّ أكيد موش صدفة.. نستدعاك على حاجة تحبها .. باش إذا حتّى لو معزتك ليّا وفات .. وإلّا جا شكون فكها و تعطات .. ما تقولش لا .. إجا .. إيجـا .. نسرقو نهار .. تحت حس مس .. مالعنين و القضاء و القدر .. تى إيجا وإلّا زعمة نجيك .. نهربو نهار يا روحى .. يا ضايعة منّى و ضايع عليك .. على بالى نخطفك ! نهزّك سيدى بوسعيد و نطيّر منّك شهوة قدّاش عندى دافنها ..على بالى حبيبى .. على بالى .. أما خايف لا تطلع زت تبدلت على ما تبدلت .. وخاطر غدوة نرجعو لسكاتنا ... نهار يتعدّا .. إذا بستك من عينك أنسا باش تعاركنى .. هوّ نهار ..

قدّاش كانت دنيا محلاها .. إنتى عندى وآنا معاك .. نغلبو كل شيئ بضحكة ودموع الفرحة .. قدّاش تبدّلنا و إلّى مشاء ما يرجع .. وصحيح ما تبقى كان ذكرى .. ويكفى منّك الذكرى يا طفلة.. ، تعرف ؟ كنّا محلانا و قد ما هربنا مالعنين قد ما زادو تبعونا .. ردّونا مسلسل .. مثال .. روبار .. مقياس نجاح العلاقات .. و المصيبة فشلنـا ! خذاونا بعين زعمة ؟.. قدّاش توحشتك يا بنيّة ..4 سنين تعداو مقط ... مرض ... أعصاب ... 4 سنين تعداو ... 4 سنين عذاب ... 4 سنين محاولة نسيان ...